نصائح مهمة جدا لكل طالب

عزيزي طالب الجامعة، سواء اتخرجت أو في آخر سنة بكالريوس أو لسه في بداية حياتك الجامعية خد بالك من كام نقطة مهمة!

- خاب وخسر، خاب وخسر، خاب وخسر اللي دخل الكلية وخرج منها ومفيش في جيبه غير التقدير، لا بيعرف لغة ولا طور قاعدته المعرفية بالقراءة، ولا عمل شبكة علاقات تساعده على إيجاد وظيفة

- هتعاني أشد المعاناة في حياتك، وهتضطر تقبل بوظائف مرتباتها باهتة، وعدد ساعات عملها قاسية، ده إن لقيتها من الأساس

- فاستعد نفسيًا لتلقي صدمات بعمرك كله في أول شهور ما بعد التخرج، هتدفع ثمنالوقت اللي أهدرته في الجامعة على الفاضي.

1- انسى اسم الكلية بتاعتك خالص، سوق العمل ملهوش في الشهادات مُطلقاً، اسم كليتك وشهادتك كانوا مفيدين لماما وبابا وهما بيتفشخروا بيك قدام طنط ليلى وعمو رجائي.

لكن في السوق هتلاقي مثلًا شاب خريج تجارة اتحرك وخد كام دبلومة وعرف يظبط English accent وبقى يشتغل في الخليج وبياخد مرتب كويس.

2- ارمي شهادتك علي عتبة الكلية، واعرف أن الرزق ملهوش دعوة بمؤهل، له دعوة بتطوير قدرات تخليك تنافس على 100 مكان.

3- سيب لنفسك فرصة للتفكير بعد التخرج، هل لازم أشتغل في المجال اللي بترسمه شهادتي الجامعية؟ ولا في شيء تاني ممكن أعمله أو هواية بحبها وعايز أعافر فيها لغاية ما تبقي مهنة بدل ما تبدأ سكة طويلة وتيجي في نص الطريق وتسأل نفسك أنا فين؟ وبعمل إيه؟ وإيه اللي مشاني في السكة دي؟، وهنا مفيش غير طريقين، يا إما تغير الكارير وده ثمنه عسير، يا تكمل بقية حياتك في بؤس، وتعيش عشان تاكل وتشرب وتربي العيلين.

4- أوعى تتنك على الشغل، كل حاجة في الكون لها بداية، مش عيب خالص لو بدأت من حاجة متواضعة وفي غير تخصصك، لأن قدراتك أقل من وظيفة أحلامك، بس العيب أنك تقف عند الخطوة دي وتقضي فيها بقية حياتك، بدل ما تعتبرها مرحلة انتقالية تتطور فيها نفسك وتروح مكان أفضل.

والعيب الأكبر أنك تقول مش لاعب، وتستنى وظيفة أحلامك لغاية ما تجيلك، ابقى قابلني لو لمحتها

5- "الحياة مش عادلة، والدنيا مبتديش للناس اللي يستحقوه" تؤ تؤ .. ده كلام يبرر به العاجزون عجزهم وآخرته قطر الحياة هيفوتك والناس هتكون ركبت صواريخ وحققت أحلامها..

مشوفتش واحد من أول ما اتخرج تعب وعمل كل اللي عليه، وربنا خذله وضيع تعبه!

وكلهم كانوا أقل منك في الظروف وشافوا المر ألوان، ودلوقتي في مراكز بحثية عالمية واللي قرر فيهم يقعد في مصر خد وظيفة أحلامه.

6- حذار من دوامة الأوهام اللي بيعشم نفسه بالسفر وهو غير مؤهل ويمشي السكة فيلاقي المحصلة صفر، واللي بيدخل يكمل دراسات عليا لمجرد إنه يبقى بيعمل حاجة تنفي عنه صفة البطالة، لأنك مش هتفوق غير لما تلاقي سكينة العمر سرقتك، وإن اللي أجلت مواجهته في سن 21، مضطر تواجهه تاني في سن 27 وما فوق!

وأخيرًا.. من اليوم الأول لحضرتك في الجامعة لازم تحط لنفسك هدف معين وتشتغل عليه عشان تقيس وتحدد مدى نجاحك من عدمه ;)

في خلال دراستك هتقابلك منح وكورسات وفعاليات مفيدة لمجال دراستك = أوعى تسيبها ! لإنها هتفيدك في مجالك مستقبلًا، أضعف الايمان هتكتبها فى الـ CV بتاعك بعد التخرج